阿松批青年工作差 上位無望要上街

【明報專訊】前財政司長梁錦松近期頻頻露面講教育，雖然之前建議推普教中、話香港唔係全部人講廣東話引起爭論，但無損阿松繼續發表教育改革建議嘅心情。佢噚日喺公開大學一個講座上演講，今次話題轉向通識科，佢話通識科範圍好廣，但質疑師資同教學時間應唔應付得晒6個必修單元，亦要思考科目深度夠唔夠，所以要檢討一下。


指通識範圍廣 要檢討科目深度

通識科強調「critical thinking」，但阿松就認為唔應該將呢兩個英文字中文譯做「批判思考」，令到學生凡事反對，所以應該改做「明辨思考」咁話。佢寄語年輕人認識國家，「對抗無意思」，同時批評政府喺過去10幾年忽視年輕人工作，令佢哋上樓困難，上位亦無望，結果要上街。


做過教育統籌委員會主席推動教改嘅阿松，噚日無再提普教中，不過就話教育制度有唔少改善空間，包括教改喺構思同執行上有出入，教學同評估方法多年嚟未見改革。佢話當初做教改時想推動「文理兼備」，但自己離開政府後，就唔知點解呢個理念會變成咗通識呢一科。


阿松又話，自己同一班教育同專業人士研究緊香港教育政策，成員包括「團結香港基金」顧問王于漸、港大前副校長程介明，同港大副教授羅致光等，希望研究完提出建議。不過，身為港大舊生嘅阿松喺離場嘅時候，就無回應點睇母校近期嘅學生罷課。