侯志強評CY 做口形講「Ｘ」 民建聯係咪兄弟？ 「我四海之內皆兄弟」

【明報專訊】上水鄉委會主席侯志強講嘢一向都出人意表，噚日佢上商台《在晴朗的一天》節目，主持乘機問吓佢點睇梁振英（CY）連任問題，而佢就好醒目咁答，「特首連唔連任，我就唔會理會」，咁如果以100滿分計，佢會畀幾多分CY呢？佢就即刻話畀夠101分，但隨即望住主持人，開住咪但唔出聲，以口形「講」咗一個「Ｘ」字，令到在場者大笑。至於佢講嘅係咩字，Emily去打聽過，但唔方便寫出嚟。


侯志強日前提出成立「新界進步聯盟黨」參選，佢承認真係組黨成功會對民建聯造成影響，因為多年嚟鄉議局大部分選票都畀咗民建聯。至於會唔會想做黨主席，一向牙擦擦嘅佢就講笑咁話，「你知我好謙虛，何德何能，新界人都係謙謙君子」。


認組黨會影響民建聯

早前有報道披露鄉議局寫咗份《新界走透透》報告，內容包括批評建制派喺關鍵時刻「背信棄義、落井下石」。同民建聯關係又點呢，侯志強話新界人同民建聯關係幾好，咁民建聯係咪兄弟呢？侯志強話：「我四海之內皆兄弟。」