樂施會新總裁 走國際路線

【明報專訊】樂施會新任總裁梁詠雩（Trini）舊年10月上任，噚日Emily同一班傳媒朋友首次同佢食飯認識吓，原來具備「國際化」背景嘅Trini最近為樂施會訂立新品牌「無窮世界」，Trini仲話，政府經常講「一帶一路」，但其實唔使政府帶頭，NGO（非政府組織）都一樣可以「走出去」，幫助第三世界國家，可持續發展就係未來其中一個重點政策。


Trini以往喺外國多個非牟利組織工作過，對上一個崗位就係幫國際特赦組織設立東亞分部，故未來佢接手樂施會，將有更多國際層面工作。


料自己作風較低調

由關注生態、人權轉到家喺樂施會關注貧窮議題，Trini話過去工作有關注中國貧窮問題，對此熟悉，未來樂施會仍然會關注本地議題，比如取消強積金對冲機制同少數族裔貧窮問題，但佢估計自己作風會較低調，唔會好似過去幾任總裁咁發表對本地議題嘅意見，仲希望透過新媒體同不同社群有多啲接觸同溝通。