新聞類別
財經
詳情#
【明報專訊】電視廣播(0511)非執行董事利孝和夫人,唔止鍾意旗袍打扮,原來佢仲好鍾意買樓。近期仲入咗兩個尖沙嘴名鑄單位,總值6000幾萬元。但佢唔係獨力出擊,而係同茂盛控股(0022)董事倫耀基,合組公司一齊入貨。
根據公司註冊署資料,利孝和夫人利陸雁群同倫耀基,90年代分別成立永瑞發展及偉達置業,總共買入6個單位,加加埋埋買入價要1.47億元,分別係兩個跑馬地樂活道、1個薄扶林美景徑、1個大埔倚龍山莊複式,現時只保留住兩個名鑄單位。
往績平平 97年曾摸頂蝕讓
4個賣出嘅單位,帳面蝕1471.3萬元,蝕錢主要係呢批單位喺97年買入,當時價錢較高,所以賣番出去唔賺得多,有部分更要蝕本離場。蝕得最多嘅係97年3月買入嘅跑馬地樂活道一個單位,買入價3204.3萬元,2005年2290萬元放出,帳面蝕咗914萬元。而賺得較多嘅係薄扶林美景徑,97年3月買入,同年6月沽出,賺170萬元。
倫耀基嘅爸爸倫志炎,都係茂盛嘅執行董事,倫伯投資物業經驗豐富,現時坐擁數以百計、市值數十億元的龐大收租物業組合,成為「超級收租公」,相信倫耀基都應該有老竇真傳嘅眼光。
利夫人家族同樣係財經人才輩出,先祖陸潤卿,係廣東銀行創辦人。曾任瑞銀亞洲董事總經理,現時成立私募基金嘅陸東,係利夫人嘅侄仔。而莎莎國際(0178)首席財務總監同執行董事陸楷,都係利夫人嘅侄仔。利夫人嘅次女利蘊蓮就喺Keybridge Capital Limited主席,呢家公司係澳洲證券交易所上市金融服務公司。
報料電郵﹕piano@mingpao.com
回應 (0)