立會新春請官員 今年午宴變酒會

【明報專訊】立法會一年總有幾次舉辦午宴，邀請特首梁振英、司局長、行會成員等同議員坐埋一齊，輕輕鬆鬆食餐飯交流吓，新年搞新春午宴亦係一大傳統，食飯之餘，官員同議員更會分組比賽玩遊戲，通常都有唔少搞笑場面發生。不過，今年新春午宴就無喇，改為以酒會形式舉行，玩遊戲呢個環節似乎亦都消失。唔通行政、立法關係去到新低點，官員、議員都費事同枱食飯？


立法會噚日向各議員發出通告，立法會主席將會作東，喺2月22日下晝5點、即係正月十五舉辦新春酒會，叫議員填番回條，報名係咪出席。


立法會秘書處回覆查詢話，呢個安排係考慮過議員、官員嘅日程，主席決定採納新春酒會呢個安排，特首辦亦表示同意。