ICC遷KCC 平租近半 積金局搬葵興 年省半億

【明報專訊】強積金管理局噚日公布，話佢哋寫字樓要搬屋喇，由現時喺西九地標甲級商廈即ICC （環球貿易廣場），搬去葵興嘅KCC（九龍貿易中心），2月22日起正式於新寫字樓辦公。Emily噚日喺積金局傳媒聚會中碰到該局機構事務總監鄭恩賜，講起搬屋係因為一年前留意到ICC租約快屆滿，聽到新租金後決定要搬，搵咗一輪後終決定搬去KCC，租金較現租便宜近一半，租用KCC嘅開支較續租ICC可年省達5000萬元。


續租新地旗下商廈

Emily聽到5000萬呢條數，都嚇到流咗幾滴汗。記者都問鄭恩賜係咪因為政府要積金局慳啲使，佢就話其實積金局都係透過成立時嘅種子基金嘅投資回報嚟營運，近年投資環境不佳，投資回報都「無咁好」。


傳媒行家都記得，積金局自2000年運作以來，一直喺新地甲級商廈辦公，先是IFC（中環國金），後來ICC，下月就KCC，都係新地嘅物業。鄭恩賜講起，該局每次入去時大廈附近都未興旺，做旺咗就要搬。除咗搬總部，葵芳新都會廣場及中環盈置大廈嘅MPF辦事處都會搬入KCC，觀塘辦事處就會保留。