有話說﹕普通話學中文比較好？

【明報專訊】做過教育統籌委員會阿頭嘅「阿松」梁錦松，之前喺一個教育主題講座中話﹕「點解中文唔係用普通話呢，唔係個個母語都係廣東話㗎嘛，如果用普通話教中文嘅話，可能寫作方面好好多。」呢番言論引起社交網頁又一次洗版，個個起勢表態撐用廣東話學中文。Mama就由細到大都係用廣東話學中文，到出來做嘢，先去上普通話堂自我增值，所以真係唔知，究竟用普通話學中文係咪真係咁好？


咁多人討論，Mama就同聖保羅書院中文科主任顏加興傾過。首先，顏老師一嚟就指出呢個言論上嘅邏輯謬誤，「梁錦松指『唔係個個母語都係廣東話㗎嘛』，同樣地，香港好多人嘅母語都唔係普通話呢」。佢又指，連當年語常會前主席田北辰都承認﹕「語常會喺2003年做過深入討論，普教中同提升中文能力無明顯關係。呢個結論至今無改變。」而佢亦非常認同，冇一個標準話普教中之下，學生嘅語文水平特別好，而粵教中嘅學生語文能力又特別差喎！


硬推普教中 反令文字失活力

佢話若果要一刀切推行普教中，只會變成一種「語言霸權」，反而減低學生對語文嘅興趣，得不償失。佢建議應該畀家長自由度，等學生同父母討論，自己選擇接受普教中定粵教中好。同時，佢又認為學生現時一星期只得7至8堂中文課，毋須連呢個時間都用埋普通話嚟教中文，會令原先用粵教中嘅時間都減少，影響學生以粵教中嘅語文學習。


顏老師又提到，其實香港學生可以做到「講口頭語」，即係用口語化嘅字詞去表達，但同時喺寫作又可以轉換返做「書面語」，係一種多才多藝嘅表現。同時，他又話廣東話亦有豐富普通話用詞嘅時候，例如，以前學生如果寫「巴士」，要改返做「公共汽車」，而家就可以直接寫巴士。所以，佢覺得如果將語言一體化，變成普教中，會失去文字自身嘅活力、特色。又指中港兩地都應該尊重對方嘅語言。


如果推行普教中嘅目的，係想同時提升普通話水平，顏老師話其實仲有其他方法，除咗平日嘅普通話堂、參加朗誦比賽、平日睇戲時聽多啲普通話，而唔一定要更改我哋嘅學習語言。講真，大部分香港人嘅母語都係廣東話，佢話成個語境同思考模式都係以廣東話為主流語言，就無謂用其他形式去干預呢個文化，變成「好心做壞事」。