雙學台灣觀選戰 冀港「第三勢力」他朝躋身立會

【明報專訊】蔡英文當選台灣總統後，去咗觀選嘅香港「雨傘運動」雙學領袖周永康、黃之鋒，以及立法會議員梁國雄（長毛）等人噚日喺台灣出席活動，慶賀台灣民主再上一個台階，呼籲港台社運加強合作交流，希望有朝一日，香港嘅第三勢力都可以躋身立法會。


雙學領袖噚日喺台灣同當地學者交流，出席者包括居於台灣嘅八九學運領袖王丹。不過，親建制嘅facebook群組「幫港出聲」即改圖發帖，將當選總統嘅蔡英文、王丹及之鋒拉埋一齊，質問咁係咪算「台獨+八九民運+香港自決」嘅合流喎。


講番佢哋嘅交流活動。周永康話，蔡英文一直講兩岸維持現狀，但佢擔心現狀難以維持，「香港80年代談回歸，一國兩制也是要維持現狀」，但認為香港目前睇嚟好失敗。黃之鋒亦話，「一國兩制行不通，一中各表可能也不太行」。周永康又以李波失蹤事件為例，話未來可能台灣人賣有關大陸嘅書，都有可能「被失蹤」。


黃之鋒就話，呢次大選睇到民進黨與新冒起嘅時代力量合作成功，太陽花學運領導者黃國昌贏到立法院議席，咁香港都應該借鑑經驗，等雨傘運動產生嘅社運代表可以入到立法會。