林煥光：應是時候退下來

【明報專訊】行政會議召集人林煥光喺官場打滾幾十年，經歷過唔少起跌。佢接受馬會刊物《駿步人生》訪問時，就用跑馬仔形容人生，「勝負往往只在零點幾秒之間，有誰敢篤定哪匹馬會贏？」林煥光又講到「做了40年公務，其實應該是時候退下來，太花時間的公務未必會再做」，唔知係咪暗示不久將來會淡出政壇呢？


林煥光喺專訪講到自己同馬嘅不解緣，話細個唔可以入馬場，所以會喺跑馬地中央公園隔住欄杆睇，睇住「龐大動物」喺眼前比併。林煥光喺1984年做沙田民政專員，同馬會嘅第一次合作，係喺一場煙花匯演借用馬場看台做主禮台，但由於出咗小意外，自此陸地上空放煙花就成為絕響。林煥光喺2005年擔任特首辦主任期間，因為傳媒報道佢嘅感情生活而辭職，不過一年之後佢就極速反彈，獲委任做馬術公司CEO，統籌奧運馬術比賽。


林煥光話，賽馬「是thinking game，是智力遊戲，用哲學角度看，與人生十分相似」。特首選舉跑馬仔已悄然展開，唔知喺呢場賽馬入面，林煥光又會睇好邊個最終可以跑出呢？