湯文亮﹕非豪宅沒協同效應 買貴即是買錯

【明報專訊】有不少人在去年不理會我的「細價樓爆煲論」而以新高價買了樓，每當被人問及，他們都會話，那些投資者都有講，有買貴無買錯，但那些人只知道其一，不知其二。


首先，有投資者收購舊樓，但有部分已經被人落釘，唯有出高價買下已被落釘物業。收購價，尤其是關鍵的一兩個單位，出高價亦沒有辦法，唔會有人話他們買得貴，因為唔買就錯。


相連地千金難買 只驚買唔到

又有一些用家，見隔離舖位放盤，都唔敢自己出面傾，搵一個陌生面孔去傾，即使那人出價比市價高，業主都不會賣給他，而會搵隔籬業主出價，如果高於別人，就會賣給鄰舍，結局是可以預料。因為大家都會知道，千金難買相連地，唔會話買家買得貴，最驚買唔到。


我預測今年超級豪宅會上升，不少人認為我厚此薄彼，細價樓下跌，超級豪宅上升，其實豪宅業主根本唔打算賣，到價都唔會賣，超高價才會考慮，難得豪宅買家又唔志在，畀多一兩成是沒有問題，如果有人問，他才會說有買貴無買錯。


豪宅買家唔志在畀多

對於其他屋苑型物業，絕對是買貴即是買錯，在某些屋苑，在半年前買兩房單位的價錢，今日可以買三房，如果有人問，我唔相信業主會答有買貴無買錯，因為在屋苑是可以買到同類型單位，在有得比較之下，買貴即是買錯，又如果有人對他們說有買貴無買錯，這只不過是安慰的說話，不能夠當真，總括來說，那些有協同效應，或者非常罕有的物業，才可以說有買貴無買錯。


紀惠集團行政總裁

[湯文亮 敢說亮話]