一帶一路 梁：對「本市」學生好

【明報專訊】特首梁振英（CY）喺今年施政報告提出多項配合「一帶一路」嘅政策，話想幫助香港經濟，但被泛民批評係為討好中央、爭取連任。梁振英噚日講到教育議題時，形容英語對學生掌握一帶一路機遇十分重要，話資助外地學生嚟到香港，課室內就唔止有「本市嘅學生」同「本市嘅老師」，當大家共同語言係英語，對本港學生嘅英語能力就有幫助。香港突然由特區變咗「本市」配合中央大方向，唔知「本市」嘅師生又接唔接受呢？


支持者場外喊「689，好特首」

CY噚日就施政報告出席立法會答問大會，立法會大樓外一如以往有集會，一如以往有人高叫CY做「689」。不過，集會者並非來自反對團體，而係屬於愛國愛港組織「保衛香港活動」。Emily見到呢名女士一邊攞住「特首利民紓困 泛民禍國殃民」紙牌，一邊振臂高呼「689，好特首」，搞到身旁嘅支持者唔知點反應好，睇嚟「689」呢個稱號已經唔再係泛民嘅專利。


立法會外可以隨心所欲叫口號，不過喺會議廳就要留意議事規則。人民力量陳偉業（大嚿）向CY提問時，多次以「689」稱呼對方，結果被主席曾鈺成警告唔可以用冒犯特首嘅言辭，大嚿就反駁話「689」係CY喺特首選舉所得嘅選委票數，無侵犯意思。大嚿之後繼續發言，話CY係見到財政司長曾俊華獲國家主席習近平握手，所以先喺施政報告追落後，聚焦一帶一路；不過大嚿其後因為嘗試拎住支叫做「銀樣蠟槍頭」嘅纓槍道具衝向梁振英，諷刺中看不中用，結果被逐離會議廳。