夢熊唔識上網識何謂「洗版」

【明報專訊】特首梁振英（CY）前日公布最新一份施政報告後，Emily成個facebook都被施政報告嘅新聞「洗版」。除咗施政報告，自稱同CY公開交惡嘅前政協委員劉夢熊（dream bear）近日為咗涉嫌意圖妨礙司法公正案出庭自辯，大爆挺梁選特首時嘅內幕，昨日仲大談「洗版」。


話說CY前晚被記者問到「知唔知咩叫做『洗版』」，CY秒回：「知！」，卻「眼光光」答唔出「洗版」點解，明明唔知又要話知。dream bear噚日朝一見到Emily，就主動講起施政報告，Emily問dream bear﹕「知唔知咩叫『洗版』？」夢熊大師喺庭上自辯時話唔識上網，連個人電郵密碼都唔知，要靠晒秘書，不過佢噚日諗咗諗就話，「係唔係即係啲網民大家都講緊同一個話題，搞到成個版都係嗰樣嘢，咁就叫洗版呀？」果然係劉博士，唔上網都知網上用語，真係「叻叻熊」。