新聞類別
副刊
詳情#
【明報專訊】特首梁振英噚日公布完《施政報告》後,下午舉行記者會,一年一度由新聞統籌專員馮煒光主持,一如以往,馮煒光唔知係咪為咗公正,定真係唔識在場記者,點記者發問時,依舊唔肯講該記者嘅機構或者名,但此舉似乎增添工作人員嘅難度喇,話說有記者明明著住紫色衫,但馮煒光叫佢發問時,竟然講咗做橙色衫嘅記者,但全場都無人著橙衫,令在場唔少人都好疑惑。
除咗顏色外,馮煒光亦似乎好心急,雖然佢一早講明記者會時間比較趕,希望大家把握時間,但過去呢類大型記者會,通常都會預留45分鐘至1個鐘;點知記者會開始咗大約20分鐘,馮煒光就同大家講「最後一條問題」,好彩呢句話最後都出現咗幾次,令記者會都有約45分鐘,但好似《明報》、《星島日報》、《信報》、《南華早報》等傳媒都無機會發問。
留言 (0)