新思維拉隊訪台 向「第三路線」取經

【明報專訊】「新思維」自成立以嚟一直強調要走有別於泛民建制嘅「第三路線」，而對岸嘅台灣總統及立委選舉，就有親民黨聲言要打破藍綠之爭。新思維主席狄志遠（阿狄，圖）噚日透露，自己同20個成員今日會出發去台灣觀戰，拜訪3個政黨嘅競選總部，又會特別留意親民黨總統候選人宋楚瑜嘅選舉工程，睇吓對方點做理念論述。不過，阿狄話相信宋楚瑜贏面唔大，自己喺選後亦會出席民進黨候選人蔡英文嘅選後演說。唔知阿狄係咪預計到選前大熱、唔走第三路線嘅蔡英文會順利贏到呢？


另一邊廂，香港立法會選舉9月舉行，阿狄話新思維已經有「三數個」黨員有意參選，自己係其中一個，雖然黨內暫時仲未討論實際會派幾多張名單、同出選幾多區，但就話新思維喺新界東做開地區工作，會「優先考慮」。