「不宜領養」唐狗女現生機

【明報專訊】漁護署捉狗隊上月22日喺元朗區捉咗隻4至5個月大嘅唐狗女，民主黨元朗區議元黃偉賢收到消息後話要領養，但署方話獸醫評估後指狗女不宜領養，原定今日要人道毁滅。Emily噚日收到漁護署回覆，話有自稱狗主嘅市民聯絡該署，家小狗女喺動物管理中心等候確認。黃偉賢預計狗女可被領走，逃出鬼門關。


狗主聯絡漁署 有心人願畀「贖金」

漁護署發言人話，該隻狗女無植入晶片，經獸醫多次檢查同評估後，發現有襲擊人嘅傾向，所以不宜領養。黃偉賢曾經提出將狗女交由其他機構獸醫再評估，但遭拒絕；署方話為保持評估公正，一般唔會接受私人執業獸醫做評估人員。


對於有狗主出現，黃偉賢亦收到消息，佢話會嘗試聯絡該市民，如果對方畀唔起1600蚊漁護署手續費，一群有心人已決定夾錢畀「贖金」，亦有愛護動物人士會想辦法收留狗女。但佢質疑署方之前話狗女不宜領養，家有狗主認頭就畀領走，呢種做法前後矛盾。佢亦批評署方對待流浪狗嘅手法機械化，會聯同愛護動物人士約見署方，討論處理流浪狗政策，希望啲狗狗唔會輕易被殺。