梁美芬like《鼠能夠》 恨上毛記表演

【明報專訊】「毛記電視」前晚舉辦「十大勁曲金曲分獎典禮」，成為網民熱話，其中「梁靚芬社區合唱團」唱出諷刺梁美芬嘅改篇聖詩《鼠能夠》，更加得到梁美芬真人喺facebook貼文畀like，話如果毛記電視有邀請佢上台表演，佢一定會湊熱鬧咁話。
廣告
「真‧梁美芬」同Emily講，話睇到條片嘅時候都捧腹大笑，覺得只要唔係人身攻擊，網上嬉笑怒罵吓都無所謂，又話政圈太沉悶，如果自己得閒，可能都會作首歌畀網民"口添"！
近期搞fb攻勢嘅梁美芬話自己好有興趣了解年輕人嘅世界，相信就算觀點唔同，大家都可以溝通，而年輕人嘅世界就好似自己個名一樣，充滿「芬（fun）」喎。梁美芬又話睇過毛記電視其他短片，都覺得好搞笑，如果對方誠意邀請，自己都會考慮上毛記電視客串吓。
梁美芬喺上年區議會選舉同青年新政游蕙楨對撼，青年新政召集人梁頌恒亦喺fb貼出梁美芬嘅留言，仲話「老鼠芬都學識請人玩fb ，2016年的選戰看來已經靜悄悄地開始」。