大輝捐錢恒管 盼推本土教育 財爺撐場互笠高帽

【明報專訊】身兼八大校監嘅特首梁振英（CY），早前被指喺閉門活動時勸商界不用捐錢畀大學，惹來非議；向來同CY唔咬弦嘅廠商會立法會議員林大輝，就喺呢個時候捐錢畀恒生管理學院。恒管噚日舉行「林大輝鐘樓」命名儀式，仲邀請到財爺曾俊華做主禮嘉賓，兩人致辭時就不約而同與CY「唱反調」。


「林大輝鐘樓」命名

大輝話，教育係長遠投資，只有「商校合作」先夠資源去持續健康發展。佢又談到本土，話希望同恒管攜手推動「本土教育事業」作育英才，真係句句有骨。


大輝話，近年唔單止經濟民生議題被政治化，就連教育界都不能避免，話呢幾年有唔少教育議題都係爭拗不斷，「一波未平， 一波又起」。


大輝讚財爺「四両撥千斤」

財爺發言時就讚大輝「樂善好施」，對教育嘅貢獻令人「肅然起敬」，講到明希望對方可以感染更多朋友，支持香港教育事業。


兩人又互笠高帽一輪，顯得惺惺相惜。大輝話，財爺每次發言都對自己有好大嘅啟發同指導，好佩服司長用「四両撥千斤」、「以柔制剛」方式做人處事。財爺就回敬，話大輝最出名嘅「武器」，就係「連珠炮發」嘅四字詞語，次次出口成文，自覺中文不如大輝。大輝早前喺報章專欄，就以大量四字詞狂批教育局長吳克儉。


大輝今次唔肯透露捐款金額，而佢嘅好友、政協常委唐英年都畀面嚟撐場。