葉劉撐周浩鼎 稱同街坊打招呼唔出奇

【明報專訊】啱啱過去嘅星期日，參選立法會新東補選嘅民建聯周浩鼎（Holden）現身烏溪沙村盆菜宴，被指同黨友周圍同人握手打招呼，事件引起爭議，而選舉對手方國珊日前走去廉署舉報，話Holden涉嫌賄選。不過，當日喺現場嘅新民黨主席葉劉淑儀就幫Holden講好話，話咁樣都去投訴，有「老屈」嘅味道喎。


葉太話，烏溪沙村盆菜宴年年都搞，佢過往有出席，而當日佢話自己喺宴會上遇到Holden，雖然無留意Holden係咪逐枱與出席者握手，「但身為政治人物或議員，與街坊打招呼有何出奇？」

葉太仲乘機話，據佢所知，出席者包括「不請自來」嘅民主黨沙田區區議員李永成，更話李永成當場捐咗1000元做現金抽獎。一早表明支持Holden參選嘅葉太話，競選對手紛紛去廉署投訴，「是一種借勢打擊對手的選舉策略而已」。


今次補選都算熱鬧，除咗Holden同方國珊，公民黨楊岳橋及新思維黃成智都報咗名，而本土民主前線發言人梁天琦亦已宣布會參選。