內地14私募基金失聯 4間要主動「浦頭」

【明報專訊】近排成日有人失蹤，原來除咗賣書嘅，依家就連成個私募基金都會失蹤（內地興叫失聯㗎）！中國證劵投資基金業協會早排就公布，話已經有14間私募失聯兼出現異常狀態，而家協會再公布新一批名單，講明有4間企業要喺5日內主動聯絡，唔係嘅話就將佢哋顯示為失聯兼異常狀態喎。


早排中國基金業協會已經公布過兩批名單，要求16間私募基金機構同協會聯絡，又係畀5日限期。但唔知呢啲機構搞乜，可能公布對佢哋無咩阻嚇性，得2間有主動聯絡同提供書面說明，其他都係無晒影，最後咪被協會網站嘅「私募基金管理人分類公示」列入為失聯兼異常狀態囉。


其實呢啲私募基金唔似得公募基金咁，拎到中國證監會嘅基金銷售業務資格，所以佢哋違規成本低啲、而且難以界定同履行佢哋應該承擔嘅責任，唔怪得中國基金業協會咁着緊啦！不過同樣係失蹤，都有分主動同被動，基金唔止唔使拍片報平安，仲光明正大走數，着數好多啦。


email: piano@mingpao.com

[小琴密語]