副校情迷蘭花 中學推生物科技種花

【明報專訊】教育界真係卧虎藏龍，好似鑽研蘭花學問逾20年嘅香港蘭藝會會長朱劍虹（圖），就係長洲佛教慧因法師紀念中學嘅副校長。朱sir仲將種蘭技術與學生分享，學校去年10月申請到優質教育基金，喺校內推行蘭花無菌繁殖推廣計劃，成為全港首間推動生物科技研究種花嘅中學，等佢同學生可以一齊培植「猴面小龍蘭」等蘭花品種。


「猴面小龍蘭」係南美洲厄瓜多爾及秘魯交界海拔1000至2600公尺雲霧林中嘅品種，朱sir話，要喺香港平地及亞熱帶地區培植並唔容易，所以要用「水冷」系統，並用無菌繁殖嘅方法。


農曆新年將至，商場都乘機搞猴面蘭花展應節吸客，朱sir就同MCP新都城中心合作，喺1月16日至2月5日於商場展出逾30種罕見嘅猴面蘭，呢批蘭花包括最袖珍、花朵高度僅1.8厘米嘅「彩虹猴面蘭」，以及100年前喺厄瓜多爾發現嘅品種「所狄羅神父猴面蘭」。