新聞類別
副刊
詳情#
【明報專訊】上星期荃灣發生一單15歲中四男生用校呔吊頸自殺嘅悲劇，Mama睇到報道話連埋呢單，由舊年9月開學到家，香港至少已發生9單學童自殺事件，Mama真係心都悒埋。
開學至今 已有9學童自殺
講返今次呢件不幸事，有報道話事件中嘅父母怕阿囝學壞，所以課外活動或者落屋企樓下打波等等，一概唔畀佢參與。Mama覺得香港好多父母都好奇怪，有啲就慌死仔女學嘅興趣班活動唔夠多，將佢哋個時間表塞到滿一滿；有啲就過分保護，盡量唔畀小朋友接觸外面嘅世界，令佢哋活係自己的保護範圍之中。
Mama同心智會教育及心理服務心理學家麥依華（Eva）傾過。佢話：「處於青春期嘅青年，社交需要特別大，又好受朋友影響，會以朋友點睇自己嚟幫自己嘅身分、形象定位。所以，如果家長過度限制仔女嘅社交圈子同活動，成日要佢哋留係屋企，搞到冇晒朋友，會令佢哋唔識點同其他人相處、溝通。導致佢哋嘅自我形象低落，情緒會容易唔開心，甚至有可能引致抑鬱症。」
過分限制社交 易令子女抑鬱
佢又提醒Mama，青少年係成長階段好需要得到愛同別人嘅關注，爸媽可以攬下佢哋，等佢哋感受到有人關心自己。佢仲鼓勵爸媽其實可以同仔女成為「好朋友」，傾多啲偈、溝通多啲，同時留意多啲佢哋嘅喜好，當佢哋同父母關係好，自然會畀到信心同安全感佢哋，發掘更多自己嘅興趣。
Eva又話最好就梗係喺小朋友小時候，同佢哋培養良好嘅親子關係啦，但家先開始都唔遲。爸媽如果唔知點開口關心仔女，佢就畀咗個貼士Mama：即管對住塊鏡練下自己讚仔女時嘅表情，睇下自己欣賞人哋時個樣係點，習慣咗就唔怕尷尬啦！
留言 (0)
