基金名人溫婉容復出 首要四天工作

【明報專訊】曾任德盛安聯行政總裁嘅溫婉容，退休16個月後，重出江湖，擔任香港財務策劃師學會嘅行政總裁。大家一定好羨慕佢份工，小琴唔知人工幾多，但一聽到係4天工作制，就已經哇哇聲。溫婉容話以前工作太忙，所以腰骨唔多好，坐又唔得瞓又唔得。佢小休期間，做多咗運動，腰骨好番好多。為咗健康着想，佢話唔想太操勞，要預留時間做運動，所以情商咗4天工作，預留1日打高爾夫球。咁筍嘅工，係邊度搵？佢話上手要進修，所以佢出山幫手，簽咗1年合約。至於1年後點安排，暫時未知。

不過，佢呢1年都身負重任，要優化財務策劃師（CFP）嘅專業試安排。學會計劃重新編排課程，令多啲有興趣嘅人考取。初步構思係分兩級制，學員考取中期專業資格，之後再考埋其他試卷，取得全個專業資格。