林鄭為立體畫揭幕 不忘批拉布

【明報專訊】大埔海濱公園近公眾碼頭增添咗一個新景點，可能啱「龍友」去影相。由馬會聯同靈美創意培育基金攜手主辦、新界社團聯會協辦嘅「同心同埔全城畫」噚日舉行揭幕儀式，喺碼頭位置地下，畫咗全港最大型7000平方呎嘅5D立體地畫，大家有時間可以去嗰度同「海豚」玩selfie。


踏住海豚畫擺pose影相

政務司長林鄭月娥噚日去大埔主持開幕禮，佢見到呢啲地畫圖案咁逼真有趣，都童心未泯咁擺姿勢、「踩住」地畫海豚個嘴影相。林太又講往事，話2007年擔任民政事務局常任秘書長時，去大埔海濱公園參加社企項目「水陸墟」活動；噚日重遊舊地，仲可以見證大家完成呢幅別開生面嘅5D地畫。呢幅地畫集合咗20個青年藝術家，以及超過200名青少年、新來港人士、少數族裔及婦女，係過去一個月攜手努力嘅成果。


不過林太講吓講吓，又將話題扯到去立法會「拉布」，話政府提出將舊大埔官立中學改裝成「大埔藝術中心」，為社區提供藝術設施，話只要立法會唔「拉布」，「盡早通過有關的撥款。今天這幅地畫正好為大埔再添一分藝術的色彩」。