論一地兩檢 話出入境非自治範圍 田二少「講大咗」 速轉軚道歉

【明報專訊】銅鑼灣書店李波失蹤事件引起社會關注。噚日港台《城市論壇》討論高鐵「一地兩檢」議題，唔少人都擔心一地兩檢實施後，公安容易「跨境執法」，事件更引發建制同泛民議員罵戰。


郭榮鏗引《基本法》154條反駁

事緣有份出席論壇嘅新民黨田北辰一度話，「香港嘅出入境不屬於香港自治範圍」，話因為高鐵涉及一條由本港駁通去內地嘅鐵路通道。田二少呢個說法即刻畀人反駁，同場嘅公民黨大律師郭榮鏗話，「呢樣嘢我真係第一次聽，因為《基本法》154條列明香港嘅出入境係屬於本港自行管理嘅範圍」，郭榮鏗仲反問田二少，如果連出入境都唔算係，「仲有啲乜嘢唔係香港嘅自治範圍，不如田生你身為人大代表，同香港人講清楚，仲有乜嘢唔係屬於香港嘅自治範圍之內，不如你一次過講晒出嚟！」


田二少當時解畫，話只要政府透過「本地立法」處理一地兩檢問題就無事，仲同郭榮鏗話如果唔服，可以尋求司法覆核，兩人喺台上爆發罵戰。呢個時候啱啱到咗廣告休息時段，不過，廣告後田二少就即刻澄清，話「香港出入境當然屬於香港自治範圍」，佢嘅意思係話，高鐵一地兩檢涉及有內地官員來港執行出入境事務，而呢樣嘢就唔屬於本港自治範圍。郭榮鏗聽到田二少咁講，同隔籬嘅講者黎廣德都話「田生你都轉軚得好快」。


田二少喺論壇後，就同Emily話自己喺論壇上「表達不清」，已經喺節目內多番澄清，「倘引起誤會，我深表歉意」。