政府上載百萬行相 網民：謝支持李波

【明報專訊】港島區噚日都幾熱鬧，上下午都有大型公眾活動舉行，大清早就有公益金「港島、九龍區百萬行」，參加者由香港大球場出發，經黃泥涌峽道、布力徑、香港仔水塘道至香港仔郊野公園遊客中心，全程長約10公里，本年度所籌得嘅善款全數資助「家庭及兒童福利服務」。特首梁振英伉儷都支持，晨早去咗主禮，而朝早天氣清爽，唔少人一家大細參與，有人帶埋狗仔一齊行。


而政府新聞網facebook就喺下晝兩點幾嘅時段，將百萬行步行活動圖文上載，當時接近支聯會搞遊行聲援銅鑼灣書店失蹤嘅5名負責人之時。有網民就「贈興」，喺留言區上載支聯會遊行相片，亦有人乘機留言回應「多謝支持李波」。