新聞類別
財經
詳情#
【明報專訊】渣打（2888）馬拉松係長跑界一年一度嘅盛事，2011年度嘅渣打馬拉松已經喺上個月30號開始接受報名。小琴身邊好多朋友都好有興趣參加，但係大家千祈唔好得個講字，有心參加嘅就要快啲報名啦，皆因全部組別嘅網上報名已經額滿，剩番少少名額係透過郵遞報名，唔怪得之渣打香港嘅行政總裁洪丕正，喺出席完銀行公會例會後，都話就嚟要截飛啦。
今次嘅馬拉松已經比上次增加咗5000個名額，所有組別包括10公里、半馬拉松同全馬拉松，夾埋有成65,000個名額咁多，而網上報名佔咗八成，郵寄報名就佔二成。
郵寄報名尚餘小量名額
由開始報名起計只係短短9日，網上報名就爆晒。小琴問過公關，佢話往年都唔會咁快爆滿，所以之前都無統計過開始報名後幾多日至額滿，但就好肯定咁話，今次9日就爆滿係破紀錄咁快，反映香港市民真係好鍾意呢個活動。
而洪丕正身為渣打香港行政總裁，噚日有記者同佢講到，今年好難報名參加馬拉松嘅時候，佢就笑晒口咁話今年反應好熱烈，網上報名已經爆滿，仲有好多郵寄報名嘅寄緊過嚟，所以剩番唔係好多位，就嚟要截飛咁話。而旁邊嘅公關就笑言未有超額認購，引嚟在場記者一陣笑聲。
2011年度渣打馬拉松會喺出年2月中舉行，雖然小琴覺得家先嚟報名成功嘅機會真係好微，但大家都可以盡最後一分努力，而報名表格就可以喺渣打分行攞到。
報料電郵﹕piano@mingpao.com
回應 (0)
