新聞類別
財經
詳情#
【明報專訊】曾經聽前輩講,投資銀行最「蝦人」做嘅就係分析員,準確預測市况咩?老闆同客戶會覺得係理所當然;稍有偏差咩?即刻覺得你無料到。加上呢個係屬於使錢嘅部門,經濟好嘅時候無事無幹,經濟唔好就裁員無手軟。不過,凡事總有例外,好似過去多次準確測市况嘅摩根大通董事總經理李晶,繼08年成為《福布斯》全球100名最具影響力女性後,今年再度入圍,排名仲高咗㖭。
排名81 比08年高14位
李晶最新嘅排名係81位,比起2年前嘅95位高出一大截,《福布斯》以「非官方的中國之音」去形容李晶,認為佢對內地經濟以及文化有見識,仲利用佢嘅觀察同見解,去幫助海外嘅投資者了解中國情况。對於再次入選,李晶話深感榮幸之餘,不忘讚下摩根大通,強調得益於公司為佢提供全球性平台。
雖然李晶多次獲選為「中國最佳策略師」,但其實佢同時做過股票部門主管同埋基金經理,絕對有別於坊間嘅分析員。
講番《福布斯》全球100名最具影響力女性,排頭位當然係當今美國總統奧巴馬的太座,除咗李晶外仲有5位華裔女性當選,排最高既係30位、淡馬錫行政總裁兼新加坡第一夫人何晶,其次排57位嘅雅芳行政總裁鍾彬嫻、排71位係新加坡電信行政總裁蔡淑君、排90位係華為科技主席孫亞芳,同埋91位嘅時裝設計師王薇薇。
回應 (0)