東方明珠副主席 高規格訪港

【明報專訊】人稱「大廚」嘅黃坤，最近又有新動作，佢旗下搞中亞石油生意嘅東方明珠（0632），噚日宣布委任一位猛人做副主席及非執行董事。呢位猛人係BAISEITOV Bakhytbek。Baiseitov何許人？公司話佢係中亞國家哈薩克斯坦嘅銀行公會主席，通告中仲特登話，Baiseitov最近來過香港，拜會香港金融局及和黃（0013）等機構，認真架勢。

來頭甚猛 哈薩克銀行公會主席

東方明珠噚日刊登喺港交所嘅通告話，Baiseitov應公司之請，訪問香港一周，期間去咗拜會中國外交部駐香港特別行政區特派員公署、香港財經事務及庫務局、香港金融管理局、香港交易所、和記黃埔集團、及國家開發銀行股份有限公司（香港分行）。咁高規格嘅安排，認真架勢，比起我哋財爺鬍鬚曾早前去寶島訪問嘅待遇，簡直高幾班。之不過，令小琴覺得美中不足嘅係，通告冇講究竟呢位中亞猛人見咗乜嘢人，事關若果講埋見過邊啲政經要人，咁廣告效果會更強。