「巴比夜宴」爆捐款口水戰

【明報專訊】上周喺北京拉斐特城堡酒店舉行嘅巴菲特、比爾．蓋茨嘅慈善夜宴（下稱「巴比夜宴」），閉門造車，當晚有邊啲富豪名人講過嘢，講咗啲乜，至今都係個謎。不過，有內地傳媒就千方百計搵人爆料，踢爆當晚嘅場景。

由中央人民廣播電台主辦嘅中國之聲《全球華語廣播網》報道，佢哋喺巴比夜宴之後，採訪咗大量當事人、知情者，蒐集多方信息，嘗試還原當晚嘅場景，被訪者姓名就沒公開。

港富豪余彭年力撐裸捐

報道話，喺當晚酒會之後討論會上，有發言嘅人包括招商銀行（3968）行長馬蔚華，佢對勸捐（勸人捐錢）提出質疑。據悉馬蔚華話：「你們兩人（巴菲特、蓋茨）可能已經知道，晚宴應該是非常引人關注，關注程度我想不亞於奧巴馬訪華，媒體反映兩點，一點是歡迎你們到中國來傳授慈善的經驗，第二是有人擔心你們勸捐，所以我想捐款是不是需要勸？」有「玻璃大王」嘅福耀玻璃董事長曹德旺就表明反對「裸捐」（將所有身家捐出），「我反對做企業家裸捐，或者是現在你在創業你就把企業捐掉了……但是你們應該有愛心，真正做生意的時候，能夠不影響你的家庭生活質量。」

不過，亦有富豪支持「裸捐」，有「慈善大王」之稱嘅香港富得發展董事長余彭年就話，相對外國而言，中國富豪對慈善事業嘅熱情不夠。佢此次北京之行，就係想去充當「勸捐」嘅角色，勸富豪們將錢捐出來，不要「子承父財」。

報料電郵﹕piano@mingpao.com