周大福 開第1000間分店

【明報專訊】噚日，可以話係彤叔（鄭裕彤）嘅大日子，佢間連鎖珠寶店周大福，喺北京開全國第1000間分店，呢間分店仲開正喺北京市崇文區，彤叔專程搭佢嘅私人飛機嚟到北京揭幕。佢話，呢間分店不但奠定咗周大福喺中國市場嘅領導地位，周大福亦都希望到咗2020年喺內地開第2000間分店。

美中不足嘅係，本來安排好彤叔嘅訪問就無咗，令到一眾傳媒朋友都幾失望，但係公關又講到彤叔好似有啲唔舒服，話時話，北京天氣又確係比香港涼好多，小琴都希望彤叔唔好冷親，好快好番喇！

座落北京崇文區 獲市政府邀請進駐

講番呢間分店，係周大福喺北京旗艦店。由兩幢樓高4層，一中一西嘅古建築所組成，總面積超過28000呎，投資超過1億元人民幣。店入面每一層，各有特色，其中就有展出彤叔至愛嘅，人手打造成之黃金仿古藝術品，但寫明係非賣品，要買就按要求訂造喇！分店坐落嘅北京崇文區亦相當唔簡單，古稱「天下第一大街」，乃明清兩朝皇帝出巡祭天嘅專用通道，北京市政府近年睇中呢個地方嘅歷史背景，可以吸引旅客，就邀請咗唔少名店進駐，周大福就係其中之一。