四叔無興趣搞免費報

【明報專訊】「四叔」公子李家傑突然殺出，話同「六叔」邵逸夫夫婦，洽談買咗無綫嘅控股權。雖然連日有好多傳聞，小琴又唔係好清楚啲料有幾堅，例如話內地科網狂人馬雲，同埋復星大老闆郭廣昌，都有興趣加入一齊買TVB。

之不過，小琴睇馬和郭的香港公司註冊登記，發現二人都唔係揸香港身分證，看來，馬和郭就算要助拳，都未必能夠揸大股，因為廣播條例規定，電視台最終主人必須係香港永久居民。

地產商辦報 想預佢一份

話時話，小琴周圍索開料，聞得原來多個地產商早排積極搞串連，準備搞份免費報紙，為廣大的地產商持平地發聲，唔好畀啲仇商主義，喺香江四圍蔓延。據聞，呢份報紙背後嘅地產商聯盟，曾經邀請過恒基四叔加入，之不過最終四叔都婉拒咗。仲有一個傳聞話，四叔同何家傾過買入商業電台嘅控制權，但呢單傳聞好似冇乜人話聽過，坦白講，小琴對呢單傳聞的可信性又確係唔多高。

不過，四叔身邊嘅人話呢排佢唔會再講嘢，即係唔再輕易同傳媒公開談話，仲設埋時限，話明今年（2010年）之內，呢兩、三個月都唔會再公開講嘢，避免不必要嘅麻煩。睇來，香江傳媒一眾行家們，要在短期找到四叔，要佢老人家大開金口，恐怕有啲難度！

報料電郵﹕piano@mingpao.com