新聞類別
副刊
詳情#
【明報專訊】主持港台節目《城市論壇》12年嘅港台電視部監製謝志峰，將會喺10月31日完約退休，佢噚日喺立法會議員劉慧卿嘅網台節目上大談主持《城壇》生涯。謝志峰透露，特首梁振英上任無耐，曾邀請對方上節目，但特首同佢講「我唔係唔想嚟，但嚟會好多人圍我，一圍就好惡搞」。謝志峰同記者講笑話，如果特首喺佢完約前肯嚟多次，佢會請晒全場飲茶！
中聯辦官員月中破天荒上電台節目講電話騙案，但原來早喺郝鐵川出任中聯辦文體宣傳部部長時，謝志峰已經邀請過郝鐵川上節目，但郝鐵川唔肯，仲回應話「小謝，你是把我放在熱鍋裏頭吧！」其他官員包括政務司長林鄭月娥、發展局長陳茂波喺擔任現任官職後，亦都無上過《城壇》，勞工及福利局長張建宗就係常客，比較「接地氣」。
談到《城壇》主持「接班人」蘇敬恆，佢形容對方係港台男神，寄語對方做呢個節目，心中一定唔能夠有敵人，對個個要一視同仁咁誓死保護對方嘅發言權。至於謝志峰離開港台，係咪真係無彎轉？謝志峰話，港台員工60歲退休其實只係前廣播處長鄧忍光一道文書，政府從來無規定，如果要變，隨時可以變，但冷面情况下，佢好難再貼個熱屁股落去喎！
留言 (0)
