首屆電競節 美少女打機隊霸氣盡露

【明報專訊】香港電腦通訊節噚日開鑼，今年仲首辦電子競技節（E-Sports Festivial）。顧名思義，電子競技即係大家以打機形式進行對決。聽聞本港首隊電子競技美少女隊伍GIRLS HK，聽日喺會展同台灣電競隊伍Logi-A一決高下。


GIRLS HK一共8人，兩個幾月前成立，各人嘅「機齡」平均只有1至2年。唔好睇佢哋弱質纖纖，一上到戰場，一樣霸氣十足！GIRLS HK主打《英雄聯盟LoL》，GIRLS HK領隊Rose話，兩年前開始打機，最迷《英雄聯盟LoL》，仲曾經試過連續打足24個鐘！對於香港嘅電子競技，Rose話比起其他地區唔夠蓬勃，以前屋企人曾經話佢只顧打機，對打機嘅形象比較負面，後來傳媒開始報道電子競技，屋企人先慢慢改觀。