李民斌俄鋁老闆中環撐枱腳

【明報專訊】俄國首富歐柏嘉（Oleg Deripaska）， 日前專程飛嚟香港，到科技大學演講，大談佢成功之道。原來，歐柏嘉今次來港，除咗出席公開活動之外，都安排咗一啲私人活動。噚日，小琴去中環四季酒店，無意中見到歐柏嘉同東亞銀行（0023）副行政總裁、李家二公子李民斌一齊，兩人走入去一間米芝蓮中菜廳撐枱腳。

通常中外富豪出街，都有好一大班私人保鑣跟住。不過，噚日據小琴所見，歐柏嘉雖然身在異鄉，但係都單人匹馬赴會，睇嚟歐柏嘉對香港治安都好有信心喎，而李民斌亦係一個人。

未見保鑣 兩人單刀赴會

當時係中午12點鐘左右，佢哋兩人有講有笑咁走入去酒店嘅中菜廳，睇嚟兩人頗為稔熟，作為東道主嘅李民斌，相信都會盡吓地主之誼，請歐柏嘉食呢餐中菜啦。

自從俄鋁（0486）上市以來，歐柏嘉先後多次來港。今次佢嚟香港，係出席科大嘅演講。今年6月俄鋁宣布同科大有一個為期5年嘅合作計劃，由俄鋁贊助150萬美元（約1170萬港元）畀科大。

合作計劃總共有3部分，包括俄鋁校長論壇、港俄兩地學生嘅交流獎項及計劃，及合作研究應用複合鋁作為創新建築物料。

喺論壇上，歐柏嘉自我介紹時話，佢喺俄羅斯南部鄉村長大，又話當年佢原本修讀工程學，但後來轉讀經濟學。

報料電郵﹕piano@mingpao.com