城大海上文物展 學張保仔「揸船」

【明報專訊】好多時睇歷史展覽，都係靠展覽文物同圖書。台灣故宮博物院第一次同香港嘅大學合作，用新媒體藝術方式重現19世紀初東亞嘅海上世界同埋清朝嘅水師改革。展覽主題係「同安．潮——新媒體藝術展——同安船與張保仔的故事」。展覽今日起至下月30號喺城市大學舉行，逢星期四休展。展覽免費開放比公眾參觀。


負責展覽嘅城大秘書長林群聲話，張保仔同展覽其中一個主題「同安船」有關，因為張保仔做官嗰陣用過佢。故宮博物院助理研究員楊婉瑜話，今次展覽用新媒體技術，突破空間限制展品數量嘅問題；技術又可以等參觀者用盡視覺、聽覺同觸覺，參與展覽互動。城大嘅創意媒體學院邵志飛教授話，參觀者可以模擬「操帆破浪」，跟住屏幕指示可以扮向敵船放炮。台灣方面就整咗「同安船」模型。呢隻船喺清朝原來係商船，後尾變咗海盜船。參觀者又可以用3D技術，掂住熒幕將「同安船」唔同部分重組。展覽又用投影技術，有張保仔、嘉慶皇帝、提督李長庚及海盜蔡牽4個歷史人物同你講歷史。