綠茶名店「食物」放廁所 中村藤吉：屬瑕疵貨已棄掉

【明報專訊】嚟自日本京都嘅抹茶百年老店「中村藤吉」係唔少綠茶控嘅心頭好，佢喺5月登陸香港，到家陣仲經常排長龍，點知噚日有人喺facebook貼出中村藤吉廁所相，仲有說明聲稱嗰張係間舖放食物喺廁所嘅「驚嚇」照片，相片顯示馬桶旁邊放咗多個紙箱，內有一包包嘢，真係嚇到好鍾意綠茶嘅Emily變咗阿驚。


「高登貼圖區」嘅fb噚日貼出呢張廁所照，仲留言﹕「 雖然放果d食物好似有晒包裝，但將食物放係（喺）廁所會唔會唔係幾好呢?」咁究竟佢哋係咪真係放食物喺廁所？中村藤吉香港店市場部解釋，話圖片中嘅貨品係瑕疵貨品，暫存嗰度係為避免阻擋通道，已經於店舖關門後清理同棄掉。佢哋話該店注重衛生，每日都檢查食品包裝同期限。


中村藤吉創立於1854年，出品曾成為天皇貢品。佢間香港店位於The ONE，成日大排長龍，收費唔平，曾有報道話佢最貴嘅別製初昔抹茶索價198蚊，食個丸十芭菲都要98蚊。