劉江華局長：多運動少爭拗

【明報專訊】噚日係「全民運動日2015」，唔少收費康體設施都免費開放畀市民使用，最近榮升民政事務局長嘅劉江華出席活動時，就著晒優閒服同波鞋，即席同眾人做健體操，揈吓手揈吓腳，又齊齊扭腰，都幾有板有眼，不過對於本港政局相關問題，佢就拒絕評論。


近日港大校委會風波不斷，日前辭去港大校委嘅微生物學系講座教授袁國勇話，過去3年政治動盪，香港失去化解矛盾能力；劉江華噚日被問到特首梁振英係咪解決唔到問題時，佢就話唔講政治，佢話社會可以少啲爭拗，多啲運動，對整體社會、對個人都有好處。


劉江華仲話，做多啲運動，對身心健康都會好啲，變相可以少啲爭拗。不過，至於點睇有人話政治力量滲入校園、換局長等問題，佢都唔評論。