列明禁不雅元素 嶺大活動申請表

【明報專訊】嶺南大學學生會之前鬧出粗口歌辱警風波，學生會早前發現，學校搞活動嘅申請表突然多咗一啲條款，包括學生團體要確保活動冇「冒犯性同不雅元素（offensive and indecent elements）」，同埋學校保留向組織者採取紀律行動嘅權力，最後要求負責活動嘅同學簽名，表示明白有關條款。


嶺大學生會外務副會長柯凱齡話，啲條款以前都存在，但舊版申請表只係畀個網址叫學生自己上網睇成過百條規定，家就喺咁多條款中揀咗幾條印喺申請表上面，仲要簽名作實；另外一張借場地申請表，以前唔使寫嘉賓名同所屬機構，家就要填，佢批評校方收緊學生活動自由。嶺大發言人就話大學冇改變學生搞活動要求，家將注意事項列出嚟，只係想提醒學生團體搞活動嘅注意事項同責任。