舌戰鉛水 黃碧雲：唔識黃敬

【明報專訊】鉛水風波搞到香港滿城風雨，噚日《城市論壇》嘉賓都因為鉛水嗌到面紅耳赤，香港管綫專業學會會長黃敬仲話市民唔應該飲「頭啖水」，「邊有人明知有毒都飲？」佢嘅意思係指大家應該開水喉放一陣水先至用嚟飲用。


論壇上先有民主黨立法會議員黃碧雲畀香港管綫專業學會會長黃敬鬧佢「侮辱我哋嘅專業」，事源黃碧雲聽到黃敬話，只要水嘅鉛含量低過10微克，大量飲用都無問題時，就挑戰佢「你有冇仔女，不如搬去啟晴邨、葵聯邨住呀？」，黃碧雲又要佢申報同西九新動力同民建聯嘅關係。


黃敬即刻反駁﹕「第一我有三個仔女，應該比你多！第二希望你唔好挑戰專業！」又話「我同佢（西九新動力及民建聯）係朋友，同你都係朋友，我哋握過手！」

不過，碧雲就話唔識黃敬，仲話「我握過好多人嘅手」。論壇後黃敬就面紅耳赤繼續鬧碧雲扮唔識自己，黃敬仲話「我永遠唔會原諒你！」


論壇上嘅專業人士多次強調根據「常識」，用水前應該先放一至兩分鐘水。黃敬又話飲「頭啖水」唔正確，「邊有人明知有毒都飲？」現場觀眾聽到佢咁講都嘩一聲！