「末日博士」狂寸美國

【明報專訊】「末日博士」麥嘉華一向唱淡美國經濟，噚日佢不改本色，喺里昂投資者論壇繼續取笑美國，話美國係現今世界唯一一個共產國家。佢不單叫大家咪買美債，咪揸美元，更呼籲大家如果買金保值，亦千祈唔好將金條擺係美國保險箱，因為隨時畀美國政府沒收，相反，儲喺香港就安全得到多，事關當美國政府一旦伸手要，中國政府會同佢講「Fxxk You」（由於語言不文，小琴特別處理），全場即時起哄，拍爛手掌。

麥嘉華喺論壇中，多次抨擊美國債台高築，只係識得不斷咁印銀紙（Print、Print and Print），解決唔到問題。麥嘉華一如以往，叫大家可以投資實物，最好買真金白銀，但千祈唔好放喺美國，因為美國無人尊重私人產權，亦千祈唔好放瑞士（以往美國人逃稅勝地）保險箱，因為美國人會威脅瑞士就範，逼令瑞士乖乖交出黃金，擺明寸瑞士當局向美國政府交出美國逃稅人戶口資料。除咗投資黃金之外，麥嘉華亦建議大家可以買鑽石，因為鑽石相比起黃金輕得多，萬一有咩事，要帶走都話咁易。

指美國快被取代 隨時爆大戰
末日博士除咗向現場觀眾傳授投資之道外，亦大談天下大勢。佢話，大家有幸處身於天下劇變之時，美國快將衰退，由新興國家取而代之。但係，新興國家崛起，亦令到石油、水等天然資源競爭白熱化，隨時引發大戰咁話，末日博士嘅寶號，果然名不虛傳。

報料電郵﹕piano@mingpao.com