中環在線：港交所擺明要Monopoly

【蘋果日報】自從收購LME之後，港交所每年都會搞個年會晚宴，年年都有個主題㗎，往年做過紅磨坊呀、一帶一路呀咁，今年嘅LME晚宴主題係「Monopoly」大富翁，小加就好快講到明喇，唔係代表我哋係Monopoly壟斷市場（雖然某程度上反映事實），只係取自起屋之意，形容係交易所不斷起嘢，今年就無咩要買㗎喇，可能係擲骰仔之年，都係為之後再起樓鋪路。
剛上任主席嘅查太第一次坐Head Table，着得都好靚架，紅色大花旗袍進場，搶晒旁邊戴黑色煲呔嘅小加鏡啦。港交所佈置個場地好有心思地切合大富翁主題，用金屬元素標誌做backdrop，仲有啲地下嘅元素粒粒，道具製作認真呀真係，照舊都有表演載歌載舞，據講單論娛樂性，係高質素過英國搞嘅晚宴。
小加仲話，今年係六年以來參加者最多的一年，一共有1,900人，連開153圍。至於紀念品，係一對新款袖口鈕，上面兩個圓圈嘅，原來係黃金標誌，又長知識了。
李華華
LiWaWa@AppleDaily.com