【財經教室】港滙掂7.85　套息交易搞邊科？

【蘋果日報】參與套息交易者，一向以外資行及金融機構居多，他們手中未必有港元，要靠先借港元再沽出然後轉楂美元套息，慣常做法是（1）透過買入遠期美元合約，（2）向金管局／銀行買入現貨美元再搭住做張掉期合約，變相就等於借入港元轉楂美元套息了。
套息交易普遍為1個月期限，也有在隔夜息逐日套，但因為唔係每間銀行都可拆到隔夜錢，所以用1個月套較穩陣。
舉例套息者用遠期交易方式操作，假設當下港滙現貨價為每美元兌7.85港元，1個月遠期價則為7.8440（遠期價較現貨價折讓就反映咗港美息差）。套息者若果今日買入1個月遠期美元合約（即沽出1個月遠期港元），就等於按7.8440港元計買入1蚊美金，但1個月後交收。
若1個月後港元現貨價繼續弱係7.85，套息者就賺咗中間息差，喺到期日沽返所持美元轉為港元，還返之前借落既港元清數，不過如果到期日港元轉強，套息者就有機會蝕。
假定現時1個月美元拆息高過港息1厘（息差1厘），1個月後滙率仍維持7.85，咁套息者每投放100萬美元（行內稱1球美元）資金，買入1個月遠期美元便可賺6542港元收益（方程式：100萬美元兌換為港元=785萬港元x1厘除以12個月）。銀行同業每手外滙交易，往往以幾百球（幾億美元）或10億美元計球來球往，所以套息可以好和味。
不過滙率一變，套息交易亦隨時有外滙風險損失，本港實行聯滙，港元上下波幅限喺7.75至7.85之間，所以套息交易亦較適用於奉行聯滙制度的貨幣。