留言《蘋果》認失誤「站長」︰預咗被炒

【蘋果日報】消失嘅銀包，激到一番好意嘅何先生嬲嬲豬，昨有一位自稱係涉事站長嘅張先生喺《蘋果》留言，向乘客及失主表示「最真誠的致歉」，網民對佢呢個做法有讚有彈。
呢位張先生喺留言承認，整唔見乘客銀包係自己失誤，而公司已對佢展開調查，仲話會深切反省，保證唔會犯同樣嘅錯，並向受影響嘅人致歉，張先生話自己做咗站長兩年幾，強調冇監守自盜，話已經有心理準備會被公司解僱。張先生又話，如果見番失主，會向佢當面道歉咁話喎！
有網民讚佢肯承擔責任，指佢知錯能改；亦有人認為站長監守自盜，必須查明銀包失蹤真相。亦有人認為，乘客執到失物，最安全嘅做法應該直接交去警署。