煤氣餐廳學Jamie培訓邊青

【明報專訊】英國人氣廚師Jamie Oliver曾經開一間餐廳，培訓失學、失業青年做廚師，仲將培訓過程製作成節目，觀眾睇住班年輕人面對挫敗、逐步成功嘅過程。而煤氣旗下嘅餐廳「名氣廊」新店，亦加入Jamie Oliver嘅培訓概念，訓練邊緣青年。

名氣廊以前喺尖沙嘴新世界中心，最近搬咗去中港城。煤氣營運總裁關育材話，佢哋同協青社合作，揀咗4個對烹飪有興趣嘅青年，提供一年培訓同就業機會，令佢哋學得一技之長。一年之後，佢哋可以選擇出去闖，騰出培訓機會畀其他人，或者睇吓到時嘅人手情况，繼續留低工作。關育材話，班年輕人除咗學廚藝，亦會有導師同佢哋分享人生目標，希望令佢哋有全面發展。新嘅名氣廊除咗加入社企概念，仲有櫥櫃展銷，推廣煤氣自家牌子Mia Cucina，櫥櫃入場價由1萬至10幾萬都有。