吳士元只得一句祝福

【明報專訊】噚日恒隆地產（0101）刊出年報，長達27版紙嘅董事長致股東函中，小琴覺得有趣嘅係董事長陳啟宗對4位前任及現任下屬嘅評價。佢對前董事總經理袁偉良讚不絕口，形容佢係「最優秀的雄才之一」；對新任董事總經理陳南祿就話係「德高望重，處事精明果斷」；但對已經辭職嘅執董吳士元，只祝佢「今後事業有成」。

呢篇有27版紙嘅董事長致股東函中，中、英文各佔一半版位，喺香港上市公司中，以文章長度計，佢認第二，恐怕無人敢認第一。陳啟宗講到董事局嘅人事變動。首先講係恒隆打咗20年工嘅袁偉良退休。佢話，袁偉良乃恒隆得以如此成功嘅重要原因之一，「其對業務瞭如指掌；迅速直達問題根源之能力，可謂無人能及；兼且其乃一位卓越之策略家。他並非本人認識之中最雄心勃勃的人，但肯定是最優秀的雄才之一」。如此高評價，可見袁生喺陳董事長心目中嘅地位。

對於由國泰（0293）過檔恒隆、接袁偉良個位嘅陳南祿，就話「和藹可親，德高望重，處事精明果斷。環顧香港，很少有華人行政人員享有如此卓越的聲譽」。至於新升任嘅執董姚子賢，則「是一位穩重的管理人，專業能幹，對公司忠誠」。

「祝他今後事業有成」

被外界視為突然離職嘅執行董事吳士元，陳啟宗透露，吳係於今年7月21日正式辭任，「正正是其和本人首次談論此必然情况之一星期後（這是原句，小琴都唔係好明）。本人祝他今後事業有成」。另外，恒隆董事齊齊加人工，加幅約18％，其中陳啟宗人工最高，總薪酬3260萬元。