中環在線：碎股黨噩耗　香港小輪股東會餅卡代午宴

【蘋果日報】股東會「碎股黨」有難！網上流傳一張香港小輪（050）嘅通告，話見到唔少人買入碎股做股東，令整體股東人數大增近半，所以美麗華宴會廳都唔夠位容納所有人，一於用餅卡兩張代替午宴。小輪今次臨時變法，相信一向精明嘅「碎股黨」都預料不及，由諗住擦餐勁變拎餅卡，分分鐘蝕章！
大家都知，股東會一向都有班「精明」股東，多年來風雨不改，用自己的方式默默「支持」管理層，不時仲一家大細或者組晒團咁又食又拎，而且為咗捍衛呢份「股東股益」，不時同公關奮戰到底，華華親眼目睹都不禁拜服。不過兵來將擋，股東來就餅卡擋，今次「碎股黨」不但蝕章，甚至「拖累」埋想食飯嘅股東。
由於恒地（012）係小輪嘅大股東，華華自然有向恒地公關八一八，佢就話每間公司處理方法不同，唔能夠一概而論，而恒地就派開點心盒，冇晒先至派餅卡，小輪嘅事，都係問返小輪。
李華華
LiWaWa@AppleDaily.com