七成求職者放棄首選職位原因竟然係…

【蘋果日報】僱主請人，成日請著個唔上心、騎牛搵馬嘅員工？！好可能因為最想做你份工嗰個，一開始已經等唔切！招聘公司Robert Half發報研究結果，發現僱主同求職者之間，對出offer嘅合理等候時間有唔同理解。正所謂「最可怕是，愛需要及時」，香港僱主普遍於請人過程中嘆慢板，54%求職者要等一個月先收到回音，27%等足6星期以上，21%仲要成2個月先覆；但係88%絕大部份求職者，認為由第一次見工，到公司出offer嘅一刻，合理時間最多只係一個月！於是多達72%求職者，因為不可等某個日子，被迫接受次選職位。
Robert Half香港執行總裁Adam Johnston表示，香港僱主因為招聘程序冗長，錯失有機會請嘅求職者，而叻仔們都知道自己搵工唔難，所以等得耐就會放棄理想職位，退而求其次，情況值得關注，建議企業簡化請人程序，平衡求職者嘅期望同公司需要。
研究由Robert Half委託獨立調查機構進行，訪問了500名本港求職者。