趙世曾兒子：劏廠最緊要用得到

【蘋果日報】子承父業像枷鎖，趙世曾兒子趙式浩欲尋找自己天地，七年前成立帝皇房地產專攻工商市場，不欲與發展住宅的父親打對台，還不屑現有「劏廠」市場生態，準備3億元銀彈，冀今年翻一倍，希望在工廈市場建立品牌。首個項目新蒲崗太子工業大廈頂層拆開46伙出售，入場單位最細218方呎。
趙式浩2011年自立門戶開設帝皇房地產，多年來從事建築工程、室內設計等，「去年開始覺得是時候擴張業務，挑戰自己，而多年來做市場推廣、物業管理、項目管理等經驗，覺得工貿市場可以做得更有規範。大膽講句，市場講呢樣嘢（工貿），應該做到有啲規範。現在很多項目做兩下之後，拍下蘿柚就走，做完之後點算呀？冇信心給消費者，但其實工作間需求好大，應該做一個口碑出來。」
攻工貿物業　拒與父打對台
特別是一些劏廠劏得幾十方呎，他稱：「最緊要用得到，現在去到一個位係啲人齋炒，我見過最細係2米半（8呎）乘2米（6呎半），開了門，就係咁大啦！其實是用不到，這個不是好現象。劏這些場可能是本身缺乏地產經驗，買回來交給一名黃綠則師就算。則師叫做乜就做，咁做唔到一個用得到的層面。」
目前他有約3億元基金在手，專攻工貿物業，進行翻新及重新定位，希望今年底將翻一倍至6億元。他解釋：「個人睇好工貿市場，老套嗰句，今年通高鐵，未來通港珠澳大橋，長遠來講，香港不是700至800萬人口市場，而是整個大灣區，講緊超過1億人口，講緊2030年超越紐約，我哋全世界最大。香港有咁嘅優勢，工貿呢啲配套係必需。內地人來港做嘢，始終要起點，而香港保護商人法例比內地完善。」至於不涉足住宅，除了辣招，他坦言：「我老竇又做豪宅，冇理由同佢打對台。」
首個項目是新蒲崗太子工業大廈24樓連天台，翻新後分拆46間工作室，首批16伙，建築218至493方呎，呎價5,533至7,223元，定價123.6萬至356.1萬元。