人稱太子安　出名唔入錶

【蘋果日報】所謂有片有真相，但《蘋果》記者要力求完美，噚日重返弼街現場了解事件。有街坊爆料話Benz男經常喺呢頭活動，皆因佢喺附近開舖頭賣電話卡，仲有個朵叫「太子安」，都幾出名㗎。


受訪稱「未停定俾人開咪喝」

但「太子安」最為人熟識就係佢成日將靚車泊喺咪錶位，「通常唔會入錶囉！」記者行行吓，真係喺街頭遇到事主Benz男，佢都肯同記者講番件事，但就唔肯上鏡。


Benz男話事發時佢送太太睇醫生，「諗住泊車去食嘢，都未停定，就俾個警察開咪喝我嘞，叫我入錶。我話點解用咁嘅語氣對我呢，我犯咗咩事呢？」所以佢先覺得㷫，佢話個阿Sir態度真係好差。


至於街坊話佢成日泊錶位唔入錶，Benz男都冇正面回應，只係話自己反省過覺得自己都有唔啱！