查氏第三代任香港興業執董

【明報專訊】香港興業（0480）查氏家族第三代，亦開始加入上市公司學嘢。噚日公司宣布，委任今年36歲嘅查燿中為執行董事。查燿中係香港興業副主席查懋成嘅愛兒，2002年加入公司，家係東南亞業務部總經理及發展總監。

恒地黃浩明擢升執董

查燿中取得Middlebury College國際政治及經濟系學士學位，以及美國「士丹福大學」商學院工商管理碩士學位。查燿中每年人工幾多，通告中就冇講明。

另一位上位嘅上市公司高層，係恒地（0012）地產發展部總經理黃浩明。恒地噚日宣布委任黃浩明作執行董事，底薪加福利每月53.3萬元。今年49歲嘅黃浩明1996年加入恒地，佢係一名註冊專業測量師，有逾25年地產估值、買賣及發展經驗，過往佢嘅主要職責係同政府傾補地價。